1. Combien il y a d'especes de Principautez et par quelz moyens elles s'acquierent. Chapitre I.

1 : Tous les estatz, et seigneuries, qui ont eu, et ont domination sur les hommes, ont esté, et sont ou Republiques, ou Monarchies.

2 : Or les Monarchies se possèdent ou comme hereditaires (c'est à sçavoir desquelles ont esté d'ancienneté possesseurs les ancestres de celuy, qui en est auiourdhuy seigneur) ou bien sont nouvelles.

3 : Les nouvelles sont ou entierement, et en leur totalité nouvelles, comme fut le Duché de Milan a Francisque Sforze : ou sont comme membres adiointz a l'estat hereditaire du Prince, qui les a conquises : comme est de present le Royaume de Naples au Roy dEspagne.

4 : Or ces seigneuries ainsi acquises sont accoustumées ou d'estre au paravant soubz la subiection d'un Prince, ou de vivre en liberté. Et s'acquierent avec les armes et secours d'autruy, ou avec ses propres forces, ou par fortune, ou bien par vertu.